一連七日書展終於結束，琴晚帶住身心疲倦嘅身體返屋企，感覺好似發咗一場好長嘅夢咁。
呢幾日我感受好深，特別係我對讀者嘅感覺，所以好想分享下。
今次書展我無咩時間去準備，加上六、七月發生咁多事，我就更加無時間。對於攪書展完全零經驗，又無錢嘅我地，攤位好多嘢都係好山寨，都係用人手寫嘢，員工都係拍擋嘅細佬細妹女朋友老婆……部收銀機都係陳年舊款……連圍住攤位嘅布都係執返嚟。
今次第一次自資出書，當然要全情投入，我向公司請左兩星期大假，希望書展完後都有時間處理訂單寄書，希望賣得一本得一本，如果唔係我就慘了。
所以全情投入底下，每一日對我嚟講都係燃燒生命，每日八點起身去銀行排隊唱銀仔，之後一直留喺攤位簽書簽到夜晚10點，12點，期間又唔敢出去食飯，好驚有讀者專程嚟到搵我唔到，後來索性拎住飯盒企喺攤位食住簽。
當收檔，返到屋企後，就係清inbox網上訂單嘅時間，一直覆到零晨四點先瞓，然後八點又再起身……我相信書展第三日開始，好多讀者都感受到我已經累到眼都開唔到咁。
但我仍然堅持唔hea簽，我嘅簽書起碼都寫幾句嘢，目的就係希望好好廷長呢段時間，而盡量同每一位讀者交流，即使對方係幫人買，但我都會真誠地感謝你地。
過往我都好強調一樣嘢，就係讀者對我嚟講好重要，無佢地根本唔會有孔明，更何況佢地專程入場就係買我本書，我就更加感激。
對話間，九成讀者都會語氣深長同我講：「孔明，你要加油寫多啲故仔，我地真係好支持你。」
「知你一直都無咩廣告又無收錢寫故仔比我地睇，今次點都買本支持你。」
「你寫嘅嘢真係好好睇，明明好多故事都無鬼，但我就睇到好驚好寒……」
「《失蹤》幾時上？本書仲有無得賣？」
每一句鼓勵說話，我都會記住。亦都有人話我平時寫嘢咁變態又恐怖，真人係咪陰陰沉沉咁……當中好多趣事都令我好回味。
而我真係估唔到，原來真係咁多人睇我嘅故仔，而且讀者年齡層非常廣，有讀緊小學嘅小朋友，有讀緊中學大專嘅後生仔女，有咗仔女嘅爸爸媽媽，連啲婆婆都有睇開……
最感動係，有讀者知我食無定時同辛苦，都有買嘢飲同嘢食比我，十分感謝你地。
講到大家最關心嘅銷量，頭幾日真係清得好快，令我都停咗網訂，將最後一輪補貨啲書集中放喺書展賣，但發覺往後幾日，書展竟然無咩人行，非常冷清，有人話係廿年內最冷清嘅書展。
記得星期日完咗書展，即刻去咗中環支援，但估唔到元朗就發生咗呢啲事，嗰晚一直睇直播睇到零晨，最後頂唔順瞓了，而第二日亦都心情好差，身體又疲倦，而缺席咗星期一書展。
雖然書展冷清，但我都理解，咁嘅社會環境下，邊會有心情行，唯有安慰自己，放上網賣，慢慢賣，照顧一下嚟唔到嘅讀者。
我唔知道今次書展，係我寫作生涯嘅句號定係逗號，但經過呢幾日，我真係覺得自己好幸福，背後有一班讀者一直支持住我，我都無得再好似之前咁心灰意冷覺得無人睇而唔寫……
我亦都知道大家真係好鐘意《失蹤》，希望套電影上𠴱陣，可以同大家一齊睇一齊感受。
孔明，再次感謝大家支持，我會努力，寫多啲故仔比大家，希望大家繼續支持，感謝。
ps： 辛苦我地同事拍擋，感覺呢幾日真係一家人咁。我地洄水文化係最特別嘅一群。
ps： 我嘅書基本上市面上已經無得賣，唔會有任何書局有，只有網上訂，亦都唔會加印同再版，賣哂就由佢絕版。
ps：同我影過嘅讀者記得inbox send返相比我，我都想回憶！o！同埋記得唔好放出黎！o！
另外，已經比咗錢訂書嘅人，希望耐心等下，因為我自己一個處理訂單同寄書…所以我需要時間去簽書同逐個逐個去寄，不便之處，敬請體諒，我會盡力去處理！－！（記得入完數要上傳網頁）
未買書而想訂而我又miss你msg，你可以直接去以下網址訂書。如果有咩問題都可以問我。
https://homingming.boutir.com/…/%25E3%258…/5419269693898752…
Search